الصاحب الي هجرني

الناس ترقد وليلي ساهـره كلـه
على وليفن ملك روحي ووجداني

الصاحب الي هجرني ومتصـل لله
مدري ظروفه تعيقـه او تنسانـي

ارجع لوقتن مضى اطويـه وافلـه
واذكر كلامه واعيده مره وثانـي

الصاحب الي مكن بالقلب ثم شله
يسوى جميع البشر من قاصي وداني

من يوم قفى روحي منـه منحلـه
كان السعاده تجيني كل ما جانـي

قضيت وقتن معه ما صار به الزلـه
همسة قصيده وصوته نغم ولحانـي

واليوم قلبي من الفرقا علـى ملـه
احاول اسلى مع طيفه اذا جانـي

رغم القساوه طلبت الله يغفر لـه
ويحن قلبه ويرجع مثل مـا كانـي

ياطير بلغ سلامي لصاحبـي وقلـه
يرد مرسال مره ولو على شانـي

وقله ترا الهجر زاد القلب بالعلـه
والعين جاها الرمد من كثر ما عاني

عز الله انه بنى في الصدر له حلـه
بنـى اساسـه وشيدهـا بنيانـي

يالله يرجع حبيبي ياعسـى وعلـه
وعيش عمري معه وودع احزانـي